អាមេរិក៖ ម្ចាស់ជើងឯកទ្វីបអាស៊ី ឆ្នាំ២០១៩ កាតា បានត្រឹមប្រកួតបើកឆាកស្មើគ្នាជាមួយប្រទេស ប៉ាណាម៉ា ដែលឈរនៅលេខរៀងទី៧៨ លើពិភពលោក ក្នុងលទ្ធផល ៣-៣ ក្នុងពូល D នៃពានជើងឯកអាមេរិកខាងជើង អាមេរិកកណ្តាល និងការ៉ាអ៉ីប CONCACAF Gold Cup ២០២១។

គួរឱ្យដឹងដែរ កាតា ជាប្រទេសមកពីតំបន់អាស៊ី ប៉ុន្តែមកប្រកួតក្នុងពានជើងឯកអាមេរិកខាងជើង អាមេរិកកណ្តាល និងការ៉ាអ៉ីបនេះ គឺជាផ្នែកមួយនៃការត្រៀមខ្លួនសម្រាប់ការចូលរួមពានរង្វាន់ពិភពលោក FIFA World Cup ២០២២ ដែលខ្លួននឹងធ្វើជាម្ចាស់ផ្ទះនៅខែធ្នូ ឆ្នាំ២០២២ខាងមុខនេះ។

ការប្រកួតនេះធ្វើឡើងនៅកីឡដ្ឋា​ន BBVA ហើយមានការពន្យារពេលជាង ២ម៉ោងដោយសារការគំរាមកំហែងពីអាកាសធាតុមិនល្អនៅក្នុងទីក្រុង ហ៊ូស្តុន។ 

ការប្រកួតនេះ ៤៥នាទីវគ្គទី១ មិនមានគ្រាប់បាល់ស៊ុតបញ្ចូលទីគ្នាឡើយ ពោលគឺនៅវគ្គទី២ នាទីទី៤៧ ទើបកីឡាករ Akram Afif របស់ក្លិប Al Sadd ស៊ុតបើកការនាំមុខមុន ហើយក្រោយមក ៣នាទី ប៉ាណាម៉ាតាមបានមួយគ្រាប់វិញដោយកីឡាករ Rolando Blackbrun ដែលធ្លាប់លេងឱ្យក្លិប Port FC របស់ថៃ។ ពីរគ្រាប់ម្ខាងរបស់ក្រុមទាំងពីរធ្វើបានដោយកីឡាករ Al Moez Ali និងបាល់១១ម៉ែត្ររបស់ Hassan Al Heidos ខណៈ២គ្រាប់របស់ប៉ាណាម៉ាវិញ ធ្វើបានដោយកីឡាករ Rolando Blackbrun ដដែលមួយគ្រាប់ទៀត និងដោយបាល់ពិន័យរបស់ Erik Davies មួយគ្រាប់ទៀត។ ប្រកួតបន្ត កាតា នឹងត្រូវជួបជាមួយកោះ ហ្គ្រីណាដា ខណៈ ប៉ាណាម៉ា ជួបជាមួយ ហុងឌូរ៉ាស់៕